Al’umma ta Mayo-Belwa a jihar Adamawa sun dakile yunkurin Kamfanin Watsa Wutar Lantarki na Najeriya (TCN) na cire da kuma mayar da injin 75MVAR/330KV (T&R) shunt reactor daga tashar wutar lantarki ta Mayo-Belwa da ke Yola zuwa tashar wutar lantarki ta Jebba a jihar Neja.
Rigimar ta fara ne a ranar Asabar, 18 ga Janairu, 2025, lokacin da mazauna Mayo-Belwa suka ga motoci guda uku masu daukar kaya suna ajiye a cikin tashar.
Wasu mutane da ba a san su ba suna aikin cire injin tare da kayan haɗinsa.
Wannan abin ya tada hankalin mazauna garin, inda suka hanzarta sanar da Kungiyar Al’ummar Mayo-Belwa Masu Kishin Kasa. Kungiyar ta gaggauta daukar mataki ta dakatar da dauke kayan aikin.
Bayan gazawar su wajen cigaba da aikin, jami’an TCN karkashin jagorancin Manajan Darakta na Ofishin Yankin Yola, Injiniya Mustapha Hassan, sun tuntubi karamar hukumar ta hanyar shugaban ta, Hon. Umaru Nashion Gubi.
An gudanar da taron gaggawa a ranar Litinin, 20 ga Janairu, 2025, karkashin jagorancin Mataimakiyar Shugaban Karamar Hukumar Mayo-Belwa, Hajiya Hauwa Ndittijo Yarima.
Taron ya samu halartar jami’an TCN, ‘yan majalisar dokoki na karamar hukuma, da kuma wakilan Kungiyar Al’ummar Masu Kishin Kasa.
A yayin taron, Injiniya Hassan ya bayyana cewa cire injin din wani bangare ne na kokarin gyara da inganta samar da wutar lantarki da kuma daidaita tsarin kasa.
Ya tabbatar wa al’umma cewa za a maye gurbin kayan aikin cikin gaggawa tare da yabawa mazauna garin kan yadda suka tsaya tsayin daka wajen kare kayan gwamnati.
Sai dai Alhaji Mohammad Lawan Danladi, Shugaban Kungiyar Al’ummar Mayo-Belwa Masu Kishin Kasa, ya nuna rashin jin dadi kan rashin bayyananniyar manufar TCN.
Ya soki kamfanin kan rashin tuntubar al’umma kafin fara aikin cire injin din, tare da kawo hujjar cewa irin wannan abu ya taba faruwa sau da dama a Mayo-Belwa, inda kayayyakin gwamnati suka bace ba tare da bayani ba.
“A bangaren wutar lantarki kadai, an samu irin wannan abu fiye da sau shida tun daga shekarar 1996. Mafi kusa daga ciki sun faru a shekarar 2003 da 2020.
A bangaren ruwa kuwa, an cire bututun rarraba ruwa tsakanin 2015 zuwa 2019.
Har ma da bangaren kiwon lafiya, an dauke muhimman kayan aiki da tankunan ruwa ba tare da wani bayani ba,” in ji Danladi.
Ya bukaci a rika bin doka da oda a duk wasu ayyuka da suka shafi kayan aikin gwamnati, ciki har da tuntubar hukumomin yankin.
Mataimakiyar Shugaban Karamar Hukumar, Hajiya Hauwa Ndittijo Yarima, ta yi kira ga jama’a da su kwantar da hankalinsu, tare da alkawarin cewa majalisar za ta magance lamarin cikin tsari.
Ta yi alkawarin isar da rahoton ga shugaban karamar hukumar idan ya dawo daga wata tafiya a babban birnin jihar don tabbatar da adalci.
Bincike ya gano cewa umarnin cire injin din ya fito ne daga Manajan Darakta na TCN, Injiniya S.A. Abdulaziz. Wasikar da aka rubuta ranar 12 ga Nuwamba, 2024, da aka aika wa Kamfanin Eurobel International Limited, ta tabbatar da umarnin mayar da injin daga Mayo-Belwa zuwa Jebba.
Al’ummar Mayo-Belwa sun tsaya tsayin daka, suna bukatar gaskiya da bin ka’ida a duk wani abu da ya shafi kayan aikin gwamnati.
Mazauna garin da wakilansu sun sha alwashin kin amincewa da dauke kayan aikin ba tare da tuntuba ba da kuma tabbacin maye gurbin su.